ฟังลำกลอน เรื่อง พัฒนาการสมัยโบราณ โดย หมอลำคำเก่ง บัวใหญ่ และหมอลำอำนาจ แผงงาม

กลอนลำพัฒนาการสมัยโบราณ

สู่มื้อนี้ โลกเฮาฮุ่งเฮืองใส ผิดสมัยโบราณ ห่างไกลกันเยิ้น ความเจริญมันหากมีหลายล้นเมืองคนทุกหย่าน เจริญหมดสู่ด้านการสร้างส่งเสริม ได้ริเริ่มแบบใหม่ทันสมัย ศรีวิไลทันใจสู่แนวเดียวนี้ ใช้เทคโนโลยีปรับปรุงบ่ได้ขาด วิทยาศาสตร์เรียนรู้สู่แขนง ค้นว่าฝนเกิดแล้ง ก็ได้แต่งฝนเทียม เตรียมผลิตแรงงานด้วยเครื่องคอมพิวเตอร์ เจริญเด้อเดียวนี้สนุกดีกว่าเก่า เมืองไทยเฮาก้าวเจริญแล้วดั่งเขา การปลูกข้าวทำไร่ไถนา มีวิชาหลักการเกษตรนำมาใช้ มีรถไถแนวทุ่นแรงงาน บ่ได้เมื่อย โรงสีโรงเลื่อย บ่อยากตำครกข้าวเฮาใช้เครื่องสี น้ำจั่งชี้กะมีท่อบาดาล แรงงานประปา ต่อมาเถิงบ้าน การศึกษาเรียนรู้ ปริญญากล้าเก่ง มีการเสงสอบได้ เรียนรู้ทั่วเถิงทางไปมากะบ่คดบ่เวิ้ง  ตัดซื่อปานหยัง ทั้งเหล่าปูหินฮองลาดยางทางกว้าง บ่มีแนวขีนขว่างขวางต้นไปง่าย มันสบายสู่มื้อดีแท้สู่แนว ไปทางใดคร่องแคร่ว ฮอดง่ายมาไว หนทางไกลสิบคืนกะหย่อเป็นคราวมื้อ มันบ่คือคราวกี้ ไปมาต้องหย่าง ต้องเดินทางห่อข้าว เดินเท้าเมื่อยนอ สู่มื้อนี้มันโลดง่ายกะด้อ ขึ้นขี่ยานยนต์ ไปทางบนเขากะมีเรือบิน ขี่ไปเทิงฟ้า ทางนาวาสายน้ำ เรือแพรวิ่งแล่น มันกะแสนสะดวกแท้ เดียวนี้สู่ราย รถแล่นย้ายขับขี่เที่ยวขน มีรถมอเตอร์จอดรถสามล้อ มันดีนอลุงป้าอาวอาผมว่า สิมันไวและช้ากะตามแท้แต่ใจ มักอยากได้ผ้านุ่งแพรถือ บ่อยากหาเข็นทอต่ำเองให้มันช้า หาแต่เงินไปซื้อคราวเดียวกะได้ใส่ มักแบบใดกะได้ มีไว้รับรอง เข้าห้องพักผ่อนโฮเต็ล ทั้งกลางเว็น กลางคืนเปิดรอคอยท่าน บริการเปิดเกลี้ยง เตียงนอนหมอนเสื่อ

เสียแต่เงินเล็กน้อย ตางซื้อค่าเช็ง มักอยากฮ่อนอยากเด้ง กะเข้าเที่ยวในบาร์ มักสุราหรือเบียร์ชนิดดีมได้ มักของไทยกะมีพร้อม สุราเบียร์ฝรั่ง ต้องการหยังสั่งได้มีพร้อมสู่แนว ไม้จิ้มแข่วยังทำแต่โรงงาน กระดาษของชำระเช็ดถูเปอะเปื้อน ของเครื่องเรือน เตียง ตู้ เฟอร์นิเจอร์ทุกสิ่ง ผ้าโกเต๊กผู้หยิงกะยังมีเรียบร้อยแนวใช้ สู่มื้อนี้ทางประเทศไทยเฮา กะเจริญนำเขาสู่อันเด้อท่าน รัฐบาลพวมเร่งแรงงานสร้างก่อ บ่ได้มีย้อท่อรอนิ่งอย่างใด รัฐเผิ่นได้จัดแจ้งโครงการออกประสานทำงาน สู่ทางวางกว้าง ห้ากระทรวงลงร่วมมือกันทุกที่ ลงมติเรียบร้อยดีแล้วแต่สภา เพื่อให้ไทยก้าวหน้า ตามที่กำหนด ชนบทคาเมขอกแคแจฮั้ว กลัวชาวบ้านซิกันดานลำบาก ภูมิภาคแผ่นพื้นไทยท้องถิ่นสยาม บ่อนใดอึดอยากน้ำ เผิ่นจัดแต่งชลประทาน บ่อนกันดานหนทางเผิ่นทำถนนให้ บ่อนอึดไฟ เผิ่นกะหาไฟฟ้าโยงมาให้ฮุ่ง จักบ้านนอกในกรุงโหลด ต้นอ้อยต้อย  จนถ้วนม่วนผินลอดสิ้นกินอยู่หลับนอน บ่อาทรแนวใด ม่วนใจเริ่งร่า สนุกกินสนุกฆ่าของกันออกสนั่น เมืองสวรรค์โลกไต้เทิงฟ้ากะบ่ปาน ทุกหมู่บ้าน บานชื่นหัวใจมีโรคภัยกะมีหมอคอยดูรักษายาแก้ ชุมสาวแส่นอมแปเฒ่าแก่ กะแห่งก้าวรุดหน้าเจริญเข้าสู่ทางสาวแม่ฮ้างกะบ่อยากหาผัว บ่ต้องกลัวผิดหวังผู้หยิงเดียวนี้ ผัวบ่มีกะหาได้ ไปมาติดต่อ บ่มาขอกะได้ ไปช้อนก่อนฌอมหวานและส้ม บ่อึดสิ่งแนวกิน ว่าแต่มีงอเงิน แล่นมาหาช้ำ อยากฟังลำ อยากดูหนังดูได้ ดูมวยช่องสี่ เปิดทีวีเบิ่งได้สมัยนี้อีหลี โทรทัศน์จังชี้กะมีทุกครัวเรือน มีเงินเดือนหรือบ่มีเงินเดือนกะส่ำกันเบิดเกลี้ยง เดียวนี้เพียงกันแล้ว สังคมทุกถิ่น การทำมาหากิน มันสะบายง่ายแท้เที่ยวซื้อส่งขาย ทุกเขตค่ายเสมอภาคเสรี มีประชาธิปไตยทั่วเถิงกันแล้ว ชุมผู้สาวกะมีแววไว โก้ โก๋ กีหลายหนี่ สนุกเล่นบักลี้ เที่ยวหนี้แต่กัน

หมายเหตุ : กลอนลำอาจไม่ตรงกับเสียงที่หมอลำร้อง อาจเปลี่ยนไปตามลีลาของหมอลำแต่ละคน

หมอลำกลอน (ฝ่ายชาย) : นายคำเก่ง บัวใหญ่ อำเภอเมือง จังหวัดอุบลราชธานี

หมอลำกลอน (ฝ่ายหญิง) : นางอำนาจ แผงงาม อำเภอเมือง จังหวัดอุบลราชธานี