ฟังลำยาว เรื่อง สารไอโอดีน โดย หมอลำคำเก่ง บัวใหญ่ และหมอลำอำนาจ แผงงาม
ลำยาวเรื่องสารไอโอดีน
ฟ้าฮ้องโย่นมาหลูโนตแต่พวกไพร่ เฮ็ดแต่นากับเฮ็ดไฮ่หากินไปซักไซ้ฝนฮ้ำให้จั่งรวย โรคและภัยไข้เจ็บหลายอีกด้วยยาป่วยอาศัยหมอ เป็นหนักมาพอ ๆ กะเพิ่งหมอกันทั้งนั้น มันกะเต็มทีแล้วแถวไทยเฮาอยู่ท้องถิ่น ทางกระทรวงสาธารณสุขเพิ่นดิ้นนำเจ้าห่วงหมู่เฮา เพิ่นเป็นห่วงหมู่เจ้าพวกไพร่ใจสลด อาหารการกินอดกะขาดแคลนสมัยนี้ คนกะมีหลายซ้ำทวีนำเกิดมาใส่ ประชากรเมืองไทยมีหกสิบกว่าล้านเมืองบ้านกะอั่งนำ โรคและภัยไข้เจ็บหลายอีกช้ำทวีหนำมานำแถม อาหารการกินแนมเบิ่งไปใจสะอื้น ส่วนของขายคนกะแพงขึ้นทวีนำนับมือหน่ำ เงินกะหายากช้ำจนมือด้านจั่งเห็น – – –
ทางกระทรวงสาธารณสุขเพิ่นจั่งเน้นทางฝ่ายวิชาการ อยากให้พวกหมู่เฮาพากันกินอาหารเพื่อพลานมัยเจ้า หลักสำคัญทางศูนย์เว้าเตือนเฮาสี่ประเภท เหตุเพิ่นอยากให้เจ้าไทยเฮานั้นใด้อยู่ดี อวัยยะวะสี่ประเภทนี้มี หนึ่งคือสมอง สองหัวใจ สามดวงตา สี่คือโลหิตเจ้าเฮาเป็นคนดีใด้สมองไวใจกลัน มันสมองพาให้ดีเลิศล้ำทำให้ได้หลื่นคน ขอเสนอแต่ต้นสารสื่อไอโอดีนกินอาหารของทะเลแน่เด้อพวกเฮานี้ มีสาหร่ายปูปลากุ้งกินบำรุงเฮาไว้แน่ อาหารทะเลมีสารไอโอดีนหมอว่าดีแท้ ๆ กินไว้พวกหมู่เฮา หนึ่งสมอง สองกับประสาทเจ้า สามส่งปัญญาสูงบำรุงไตไปเด้อลูงอย่าปล่อยหลานเฮาเด้อป้า ปลาทะเลหอยกุ้งบำรุงสมองสองประสาท ความสามารถของหมู่เจ้ากะสิใด้ปัญญาใช้สิหลั่งมา อีกข้อสองคือหัวใจเจ้านั้นน้าพาอยู่มีความสุขทุคนมีใจครองผ่องมีน้ำนมไว้ ใจมีนมมารดาเลี้ยงเพียงพอลูกน้อยอ่อน ลูกเกิดใหม่ให้แม่ป้อนนมไว้ในระหว่างหกเดือน พอแต่คลอดลูกม้มประมาณเคิ่งนาฬิกามารดาเฮาควรหัดดูดนมชะลอเลี้ยง ลูกเจริญวัยด้วยสมบูรณ์สุขภาพ โปรดให้รับทราบไว้ไทยเจ้าอย่าปล่อยวาง นี้ละคือเรื่องสร้างเสริมใส่อนามัย เจริญวัยสมบูรณ์สุขลูกเฮาถนอมเลี้ยง อีกข้อสามดวงตาเจ้าตาเฮาทั้งสองลูก เฮ็ดให้ถูกเด้อพี่น้องของแพงนั้นกะแม่นตา วิตามินเอนั้นน้าสำคัญอาหาร ขาดวิตามินเอตาบอดช้ำไว้แม่นหมู่เฮา วิตามินเอนั้นเด้อพวกหมู่เจ้าหาง่ายกะคือผัก วิตามินเอบีสูงนักแม่นผักและผลไม้ ผักตำนินผักบุ้งหมากหุ่งสุกแห่งมีค่า กินเพื่อบำรุงตาหากินเด้อพวกพี่น้องฟักทองนั้นแห่งแม่นแนว อีกข้อสี่กะคือเลือดนั้นแล้วแนวแม่นสำคัญหนัก หากินผักสีเขียวเกี่ยวกันกับทางเนื้อ หากินเสียผักผลไม้กินกันไปไว้ทุกทั่ว ไผฮักตนแพงตัวถ้ากลัวตายกะให้เจ้าเฮานั้นหมั่นถนอม โตของเฮาสีมีสุขภาพพร้อมดีเด่นอนามัย กายกับใจมีความสุขทุกข์กะเบาบรรเทาได้ มีพลานามัยดีกว่ามีเงินล้านทางการหมอเผินบอกกล่าว ขอให้ชาวพี่น้องจำไว้แม่นสู่คน – – – ผู้ฟังเอ้ย
หมายเหตุ : กลอนลำอาจไม่ตรงกับเสียงที่หมอลำร้อง อาจเปลี่ยนไปตามลีลาของหมอลำแต่ละคน
หมอลำกลอน (ฝ่ายชาย) : นายคำเก่ง บัวใหญ่ อำเภอเมือง จังหวัดอุบลราชธานี
หมอลำกลอน (ฝ่ายหญิง) : นางอำนาจ แผงงาม อำเภอเมือง จังหวัดอุบลราชธานี