กลอนลำ ประกาศชื่อ โดย หมอลำวร มีแสง และหมอลำกงเจียม อุปริมาตย์

กลอนประกาศชื่อ

มา ๆ แล้ว สังวรมาแล้ว มาเอาแนวมันไว้มาเอาในไปหว่าน คันผู้ได๋ขี้คร้านบ่ได้เฮ็ดแนวเสียงแจ้ว ๆ รีบมาเบิ่งไผลำมันสิงามปานใด ประกาศตัวเทิงฮ้าน การลำร้องทำนองดีบ่รีบพากันติดต่อเอาเมือไว้ปูกบ้านหลานเจ้าจั่งสม นี้ละเจ้าเขาว่าสังวร ลำก็เป็นหลายตอนชื่อเสียงคนย้องทำนองเต้นเสียงยาวลำเติ่น ให้คนฟังเพลิน ๆ ลำแบบลมพัดไม้ไผได้สิว่าดี จังหวะนี้ออกห่อนแฝนยก ถกขาสีนวยนายแอ่นกายลีเหลียง ว่าแล้วเอียงแขนซ้ายนวยนายเหยียดแอ้น ตีนขยับเยียบแป้นแขนเต้นไต่กลอน นี้ละครับจังหวะเขาเต้นก้อนย้อนแน่ลำนำทำให้ฝูงคนมองส่องนำตาค้างมีหลายท้างทางเดินเพลินไต่ ลำไว ๆ ช้อนเด๊อะลิ้นไล่กัน แล้วจั่งสับ ๆ ช้อนทอนเสียงลำหน่ำ ลำจังหวะลูกโซ่ให้คนโย้ลุกมอง ว่าแล้วฮ้องโอ้โอ๋ยลงตัด ลำจัด ๆ ไว ๆ ไล่ลงเสียงโหน่ง แล้วจั่งลงทางเต้นเลยนำโอ้เอ่ย ลำจังหวะเลย ๆ พุททัยสงดอกท่านฉันได้ผ่านเห็น เป็นบ่เจ้าขอนแก่นลำจัดบ่มีเลยเสียงคัดหลวงใดปานน้ำ ลำลงทุ่มคุมเสียงเกี้ยวหย่อยเสียงพอย ๆ โยน ๆ คนเนิ้งเคิ่งกลางสังวาดนี้เขาว่าภูเขียว เทียวไปทางอุดรเล่งเร็วปานม้า ซาหยังเจ้าเซาลำบ่คือพี่ ลำบ่มียิ้มแยมแนมสิ่งเพิ่งไพ วรนี้ใด้สมัยเก่าสมัยกลางทางภูไทดอนตาล ดอกกระเจียวคาก้น โอ้โย่น ๆ มาคุยกันพญาหย่อยเห็นว่าวรผู้น้อยบ่กลัวย้านย่อนไผ แถวทางได้บ้านไผ่ศรีสงคราม ลำจังหวะงาม ๆ เล่งเร็วไวข้า โงมาก้ำการลำออกท่า ศรีสะเกษบ่ช้าลำจ้อต่อถาม เลอะเรียบกำเมืองใหญ่อุบลทอง ลำเสียงหองเสียงโยนญ้านกลางลงทุ้ม แลวกระดุมมาเต้นเลยไปลายล่อง มันมีหลายทำนองบ่ทนแต่สิเว้าลำเข่าใส่แคน ขงเขตแค้นเมืองใหญ่ไทยบ่คือหมอสังวรว่าดีพอใช้ ไผเห็นย้านสังวารลำยังศิษย์มีครูมีบาว่าแต่วรโอ้ขั้นคันจ้างบ่ถอย สวัสดี พี่น้องที่มาห่วนในงาน มีครูบาอาจารย์มากตาหลายหน้า ก้อหลวงตาพระครูท่านผู้ทรงธรรมนำแผ่ พวกพ่อแม่พี่น้อง ยอย้องแม่นนับถือ ผมมันคนใจซื่อยกมือใส่เพียงตา ขอหวายสาอาจารย์ เฉพาะงานวันนี้ นอกนั้นมีหลายทานเพราะเป็นงานยิ่งใหญ่ ผมขอหว่ายทุกฝ่ายทางกำนันผู้ใหญ่บ้านงานนี้จั่งแม่นดี ผู้เพิ่มมีหน้าที่ทางฝ่ายปกครอง ผู้เพิ่นมองการไกลเพื่อประชาหลายล้นเขตตำบลกระหลายบ้านประสานกันไปทั่ว มารวมหัวมุ่งหมั่นงานนั้นกระเดิน เผิ่น จั่งเอิ้นเลือกว่ากำนันเป็นบุคคลสำคัญผู้ดีมีไว้ มือนี้วรขอหว่ายพ่อกำนันไว้สาก่อน ดูแลความเดือดร้อนไกลใกล้ให้หลำมอง สองแมนผู้ใหญ่บ้านทำหน้าที่ปกครองบ้านเจ้าของพัฒนาเบิ่งประชาไปพร้อม ผมขอยกมือน้อนสวัสดี พ่อผู้ใหญ่ เอาใจใส่ลูกบ้านสมท้านเป็นผู้นำ หวายไปหมดทุกก้ำทุกฝ่ายสายงานเพื่อเป็นการสัมพันธ์ทุกคนเตรียมพร้อม ชอมเบิ่งงานวันนี้ดีจริงพร้อมพร่ำ ผมมาลำจั่งชี่กระมีหน้าแจ่มใส พวกที่มารับใช้คือฝ่าย อ.ป.พ.ร. นั้นกระเตรียมกันพอสู่คนมีไว้ มือนี้วรขอหว่ายหลายทางหลายฝ่าย บ่ว่านายและแผลงแรงน้อนแมนช่วยเหลือ เผิ่นมีใจเอื้อเฟื่อเผื่อแผสังคม ผมขอชมหลาย ๆ อยู่สบายหายฮ้อน หลายองค์กรบ่เคยท้อไผมันให้ตั้งต่อ พวกเป็นแพทย์เป็นหมอ อ.ส.ม. พ่องนั้นหันหน้าใส่กัน ทุก ๆ ท่านที่มีเกียรติสูงศักดิ์ ต่างก็มีใจรักต่อกันฉันท์เพื่อน เดือนและดาวอยู่เทิ่งฟ้าเวหากระยังหุ่ง พวกแม่ป้าพวกพ่อลุงวรขอหว่ายอีกช้ำมาลำให้ช้อยงานลำบ่ดีย่าฟ้าวฮ้ายปอยแฉงแทงใจ ขออภัยนำหลาย ๆ บ่ถูกใจชุมเจ้า คือกับเฮากินเข่า บางคาวแซบอร่อย ลำจังชี่บ่ถืกหูนิดน้อยอภัยให้แก่ผม ผมผู้ลำยากให้ดีเลิศล้นอยากให้ม่วนไพรเลอะ อยากให้เพาะหูคนกระพองจนใจช้ำ เว้าพื้นลำคันเสียงดี คันเสียงให้สิลำไปแนวใด มันก็ได้ดอกเด๊พ่อ หมอสังวรบ่ได้ยอโอ้โป้ว่าโตนี้เก่งหลาย มือนี้วรขอหว่ายทุกฝ่ายที่มาดู บ่เถิงหูเถิงใจโปรดอภัยให้ผมด้วย คันเสียงสุดเสียงส่วยบ่อำนวยเปิดป่อง ขออภัยนำพี่น้องอย่าโฮ้ฮ้องแม่นด่าผม เด้อคนชม…

หมายเหตุ : กลอนลำอาจไม่ตรงกับเสียงที่หมอลำร้อง อาจเปลี่ยนไปตามลีลาของหมอลำแต่ละคน

หมอลำกลอน (ฝ่ายชาย) : นายวร มีแสง อำเภอลืออำนาจ จังหวัดอุบลราชธานี

หมอลำกลอน (ฝ่ายหญิง) : นางกงเจียม อุปริมาตย์ อำเภอลืออำนาจ จังหวัดอำนาจเจริญ