เสียงและบทสวดสู่ขวัญบ่าวสาวแต่งงาน ในพิธีกรรมแต่งงานแบบอีสาน โดย นายทนงศักดิ์ ดวงศรี

“ศรี ศรี มื้อนี้แม่นมื้อดี เป็นดิถีก่อเกิดว่าประเสริฐมุงคุณ ว่าเป็นบุญน้อยหน่อ ใหญ่ท่อพ่อพอแห้ง นุ่งผ้าแพรตกแต่ง หวีผมแบ่งเป็นกุมาร มีเฮือนชานให้ได้อยู่มัมจากอู่สายไหม เป็นทรามวัยน้อยอ่อนแก้วใสส่อนน่ารี สาวผู้ดีไฟอยากฮ่วมคนอยากฮ่วยเฮือนนอน คนออนซอนเหลือหลาก งามหน้าผากหูตากิริยาโอนอ่อน งามทั้งหม่อนเลาคิงสมเป็นหยิงคุณค่า ไผกะว่านางแมนมาแต่แถนสมสู่ งามทั้งคู่ชายหญิงงามชายอิงมาแอบ งามได้แบบทั้งสองมาปองดองสมเผ่า พี่น้องเหล่าสองทางทั้งสาวนางและเจ้าบ่าว พี่น้องป่าวมาโฮมคนมาชมพอหมื่น คนแตกตื่นมาโฮมงัน มารวมกันพอล้านไปกล่าวต้านโฮมเอา ทั้งสองเฮาสมเผ่ามีบุญเก่าทั้งสอง จึงมาครองเป็นคู่ ได้มาอยู่โฮมกัน อยู่หลายวันตกแต่งแก้มแป่งแซ่งนางแมน พญาแถนจากฟ้า ส่งหน่อหล้าลงมา สองขวัญตามาพบพ้อ สองน้อยหน่ออินทร์แปลง ไผได้แยงงามยาดย้อย เป็นหน่อน้อยของพระพรมขุนบรมเผิ่นแต่ง เกิดคนแห่งมาเห็นกัน สายสัมพันธ์บุพเพสันนิวาส มาจากเครือเขากาดพระอินทรา จ่องลงมาแท่แล้ะ แท้แล้ ลมมืด ตอกพัดไปคนแจ ลมมีด แภพัดไปให้ห่างในระหว่างทางไป ผู้หนึ่งไกลถึงอุดรขอนแก่น ผู้หนึ่งแล่นถึงเมืองเป็นจาน ไปอยู่นายเจริญวัยน้อยหนุ่มโตเป็นพุ่มดกหนา มีปัญญางามสะอาด เครือเขากาดเลยพาดหนี นานหลายปีสองอวนก่อน เลยกลับบ่อนหวนมา ถึงชาตาหนีบ่อได้จึงได้ให้ผู้ใหญ่มาขอจึงได้ย่อพาขวัญตกแต่ง แก้มแป่งแซ่งจั่งได้นั่งสอลอน สองงามงอนจั่งได้มาเป็นคู่ สิได้อยู่เคียงหมอนสิได้นอนเฮียงข้างบุญสร้างแต่ก่อนมา มาเยอขวัญเอย

ขวัญเจ้าไปเที่ยวค้าขาย ทั้งแพรวาทั้งสิ่นหมี่ ส่าวผู้ดีอยู่ฝ่ายใต้ไทยลื้อให้ต่าวมา ขวัญเจ้าไปชมชู้ทางภูเวียงฟ้าหย่อน ๆ อย่าไปนอนอยู่ค้างทางพุ้นให้ต่าวมา ว่ามาเยอขวัญเอย

ขวัญเจ้าไปแดนแม้วเมืองแถวไม้ล้มแบ่ง บ่อนศรีโคตรไล่ฆ่าช้างทางเวียงจันทร์ฟ้าหย่อน ขวัญเจ้าไปอยู่ซ้อนนอนลี่อยู่ป่าไพร ขวัญเจ้าไปทางพุ้นเกาะกลางบ่อนน้ำถั่งบ่อนฝรั่งต่อสู้บู๋ม่างไล่ยิง ว่ามาเยอขวัญเอย

ขวัญเจ้าอย่าได้ไปอยู่นำเขา ขวัญเจ้าอย่าไปเซานำเผิ่น ขวัญเจ้าอย่าได้ปีนป่าหนี้ คันขวัญเจ้าได้ลี้พนมเปญเขมรต่ำ อย่าไปนำหมู่แม้วแถวพุ้นให้ต่าวมา ว่ามาเยอขวัญเอย

ขวัญเจ้าไปทางก้ำเวียงจันทร์สัตนาค ขวัญเจ้าจากแม่เลี้ยงเฮียงซ้อนหมู่มอญ ว่ามาเยอขวัญเอย

ขวัญเจ้าไปทางก้ำเชียงตุงแม้วหม่าน ขวัญเจ้าไปอยู่บ้านชาวม้งให้ด่วนมา ขวัญเจ้าไปอยู่ พุ้นทางเสียมราชนครธม ขวัญเจ้าไปชมนครวัดอย่าโดนให้โงโค้ง ขวัญเจ้าลงไปถ้ำแดนกุลาพายหย่ามเมืองพุกามย่างกุ้งให้มาถ่อนอย่าอยู่นาน ว่ามาเยอขวัญเอย

ขวัญเจ้าไปนำช้างเสือสาง อง มั่ง ขวัญเจ้าไปไล่เก้งผายพุ้นให้ต่าวืน ขวัญเจ้าไปทางพุ้นอินโดให้โงต่าว ไปเห็นบ่าวเห็นสาวปาเต้พุ้นเซาถ่อนให้ต่าวมา ขวัญเจ้าไปทางพุ้นเมืองลังกาทวีปใหญ่เกาะสิ่งหลออยู่ใกล้ ไปพุ้นให้ต่าวคืน ว่ามาเยอขวัญเอย

ขวัญเจ้าไปหาปลาล่องทะเลอวนซ้อน ขวัญเจ้าไปนอนค้างกลางดงพงป่า ขวัญเจ้าไปเลาะเล่นหลงแม้วกะเหรี่ยงดอย ว่ามาเยอขวัญเอย

ขวัญเจ้าไปทางพุ้นภูซุนภูส่อง ขวัญเจ้าไปส่องน้ำทะเลกว้างอ่าวกระแส ขวัญเจ้าไปอยู่พุ้นเมืองท่าสิงคโปร์ กะให้โงมาเฮือนอย่าอยู่ดนวันนี้ ว่ามาเยอขวัญเอย

ขวัญเจ้าไปชมห้องวิมานทองหิมวาส เห็นปราสาทใหญ่กว้างให้มาถ่อนอย่าสินอน ขวัญเจ้าไปทางก้ำบุรีรัมย์ ศรีสะเกษ ขวัญไปชมประเทศพุ้นทางก้ำฝ่ายเขมร ขวัญเจ้าไปเห็นแล้วทั้งสองให้กลับต่าว ให้เจ้ากลับฝั่งฝ้าวทางบ้านเพิ่นสิคอย ว่ามาเยอขวัญเอย

ขวัญเจ้าไปอยู่ก้ำเมืองใหญ่นครพิงค์ ขวัญเจ้าไปอิงชมบ่าวสาวทางนั้น ให้ผันผวนย้ายไว ๆหย่าสิอยู่ ขวัญไปชมป่าไม้ไทลื้ออย่าไกล ไปทางก้ำฝ่ายให้ให้กลับต่าวคืนมา ลุงอาว อา ยายเฒ่า หลานเหลนสินำแห่อย่างได้แวเปลี่ยนทางเจ้าให้ต่าวมา ว่ามาเยอขวัญเอย

ขวัญเจ้าไปทางพุ้นเมืองสตูลแม่น้ำใหญ่ ขวัญเจ้าไปอยู่ลี้อย่าหลงค้างระหว่างทาง อาสวนยางให้มาเฮือนบ่อนที่เคยชมช้อน ว่ามาเยอขวัญเอย

พ่อเจ้ากะได้สร้างเฮือนใหญ่มุงหนา แม่เจ้าพากันสร้างเคหาหลังใหญ่ พ่อเจ้าไปเที่ยวซื้อเฮื้อนเย้าแต่งนำ ว่ามาเยอขวัญเอย

มีทั้งพาขวัญตั้งจวงจันทร์ทั้งขันหมาก มีหลากล้นเหลือไว้ใส่พาเงิน คำแก้วเต็มถงกะทั้งไถ่ ตกแต่งให้สองเจ้าอยู่เคียง เตียงทองตั้งหมอนลายมัดหมี่ มีสู่เบื้องมาพร้อมสู่อัน ขันตกน้ำทั้งกรวยค้างแอ่ง พ่อแม่แต่งไว้ให้สองเจ้าบ่อไลย เพิ่มแต่งไว้ถ้วยบ่วงโอขัน เงินคำมีสิ่งได้หาไว้ หามาให้เทิงไถเทิงคาด สาดเสื่อพร้อมหมอนมุ้งสู่อัน ค้นแม่นหาบ่อได้มีตั้งแต่เดือนดาว ค้นแหม่นมือซาวเถิงสิจองเอามาให้ ว่ามาเยอขวัญเอย

ขวัญแข่งมาอยู่แข่งลีลา ขวัญขามาอยู่ขาลีอ้าย ขาอ้ายก่ายขานาง ผัวเมียกัน ให้ฮักห่อ คือผัวถ่อเมียพาย ไปทางได๋กะให้บอก เข้าตามตรอกออกตามประตู อย่าซูลูเป็นเขยและสะใภ้ ให้เจ้าได้บุตรตาเลี้ยงง่าย พ่อสั่งไว้สอนเจ้าให้จื่อจำคุณพระสงฆ์สินำยู้ คุณพระธรรมสินำส่ง บุญกุศลสิส่งยู้ชูเจ้าให้มั่งมี เจริญศรีเจริญหมั่นพันปีให้ข้ามล่วง ทรัพย์สมบัติทั้งปวงขอให้ไหลหลั่งเข้าโฮมเจ้าคู่สู่แนวเด้อ”

หมายเหตุ : บทสู่ขวัญอาจไม่ตรงกับเสียงที่หมอพราหมณ์สวด อาจเปลี่ยนไปตามลีลาของหมอพราหมณ์แต่ละคน