เสียงและบทแหล่สอนผัว โดย นายทนงศักดิ์ ดวงศรี

“เพิ่นว่าเป็นผัวนี้ให้มีดีสักร้อยเทือ ท้าวเอย ดีกว่าเมียไปอีกซ้ำ จังคูณค้ำฮุ่งเฮือง ตามฮีตเบื้องเครือญาติวงศา โคตรทางภรรยา อย่าหมิ่นแคนคำฮ้าย สายทางเมียให้ถือหมั่นสำคัญกว่าเรื่องอื่น อย่าสะฝืนหล่บหลู่บู๋ดั้นหลืนครอง ให้เคารพพี่น้องพ่อแม่ตายาย กลายไปมามองเห็นอย่าซะแพงความเว่า คันเพิ่มเป็นคนเฒ่า ให้ยอคูณเอิ้นพ่อแม่ ใหญ่ให้ว่าลุงสูงให้ว่าป้าพอเป็นน้าและน้องหลาน หล่อนให้เบิ่งเอาความปากเว้าเข้าขอบครองเขย อย่าสิเลยตามเลยล่วงเกินเลินเล่อ อย่าซะเผลอความเว้าหนักเบาสูงต่ำ คำปากบ่ได้ซื้อจาเว่าให้อ่อนหวาน อย่าขี้คร้านงานเวียกให้จักเฮ็ด ทำให้เสร็จการงานอย่าปล่อยป๋าลาเว้น อย่าสิมัวหาเล่นป๋างานขีคร้านใหญ่ ความจังไรเดือดฮ้อนสิโอมไหม้จี่เผา ติดไปฮอดลูกเต้าความชั่วมัวหมอง กรองให้มันคัก ๆ

ฮักดีให้อดกลั้น ให้มีขันติหมั่น อย่าผันแปรเป็นขันแตก อย่าชะแยกออกฮั่วหนามติ่วสิตอกตา ตามตำราไขชี้ชายดีมีโฉลก ชายถืกโศกถืกชั้นสวรรค์ตั้งแต่งแปลง อย่าเป็นชายไหลแล้งน้ำแบ่งเชียงของ เป็นชายเงินชายทองให้ข่องคือควรย่อง ไปตามครองไขชี้อุดมดีสุดตลอด จั่งสิปอดอ้อยซ้อย เต็มร้อยแห่งชาย สอนไปหลายมันกว้างดวงพระธรรมบ่ฮู้อิ่ม ซิมแต่พอย่อ ๆ พอฮู้ฮ่อมกระบวน ตามสำนวนไขชี้ ประเพณีโบราณกล่าว ขอให้พวกหมู่เจ้าจำไว้อย่าสิลืม เด้อ”

หมายเหตุ : บทสู่ขวัญอาจไม่ตรงกับเสียงที่หมอพราหมณ์สวด อาจเปลี่ยนไปตามลีลาของหมอพราหมณ์แต่ละคน