เสียงและบทสวดสู่ขวัญธรรมดาทั่วไป โดย นายเหวย ศรีภักดี

“ศรี ศรี สิทธิพระพร บวรพิเศษ อติเรกเตโช ชัยมังคลาดิเรก อเนกสวัสดี ไมตรีจงมีแก่ท้าวพญา เสนาอำมาตย์ศรีธาตุราชกุมาร ให้อยู่สุขสำราญตราบต่อเท่าภริยา ทั้งบุตตาแลลูกเต้า ขอให้ได้เป็นเจ้า เป็นใหญ่แก่กว่าคนทังหลาย คีงสำบายบางล้ำเลิศ ข้าแก้วเกิดกลางโฮงทั้งรี้พลแลไพร่น้อย อายุค้อยจากชีวัง ขอให้มีอายุยืนยาวบ่น้อย ขอให้ได้ฮอดฮ้อยเก้าขวบเนานาน ฝูงหมู่ศัตรูมารอย่ามาเบียดบังได้ ขอให้พระแก่นไท้มาตรัสส่องสรญาณ ลงมาโจมขวัญหลานเจ้าให้ใหญ่สูง ลงมาจูงขวัญหลานเจ้าขึ้นให้กว้าง ศรีศรีมื้อนี้แม่นมื้อดี ศรีศรีมื้อนี้แม่นมื้อหมั้น หมั้นให้เจ้าหมั้นยิ่งกว่าก้อนผาแอ่น หมั้นให้เจ้าหมั้นยิ่งกว่าแท่นพระจวงพระจันทร์ หมั้นให้เจ้าหมั้นยิ่งกว่าเครือเขาหลวงไกรลาส หมั้นให้เจ้าหมั้นยิ่งกว่าอากาศศูนตะวัน หมั้นให้เจ้าหมั้นยิ่งกว่าพระจันทร์ ใสส่องแจ้ง หมั้นให้เจ้าหมั้นยิ่งกว่าเขากวางยามเดือนสี่ หมั้นให้เจ้าหมั้นยิ่งกว่าเสากี่ลูกสาวพญาแถน พญาพรหมฟากฟ้า มื้อนี้แม่นมื้อชะง้า หมอเฒ่าว่ามื้อแข็งวันดี วันดิถีอมุตตโชคสิทธิโยค พร้อมอุตตมังคลา เพิ่นจึงไปอาราธนาอาจารย์ผู้ฉลาด มานั่งอาสน์คูณขวัญคูณขวัญ ขึ้นเสมอจอมผาสารท คูณขวัญขึ้นเสมอธาตุศรีจันทร์ มื้อนี้แม่นมื้อสันวันนี้แม่นวันดี วันดิถีอมุตตโชค โตกนี้หากแม่นโตกไม้จันทร์ ขันนี้หากแม่นขันไม้แก้ว ขุนนางตกแต่งแล้วจึงให้ข้อยคูณขวัญ วันนี้แม่นวันดี ข้อยจึงสู่ขวัญแก้ว กู่เกิดกลางเมือง บุญเฮืองงามยิ่งย้อย ทังหนุ่มน้อยและปานกลางทังสาวฮามแลเฒ่าแก่ พ่อแม่พร้อมลูกเต้าแลนารี”

หมายเหตุ : บทสู่ขวัญอาจไม่ตรงกับเสียงที่หมอพราหมณ์สวด อาจเปลี่ยนไปตามลีลาของหมอพราหมณ์แต่ละคน