ฟังลำกลอนเกี้ยวต้นกำเนิด โดย หมอลำสมัย พันธ์โบ และหมอลำเดือนฉาย หล้าบุดดา

กลอนเกี้ยวต้นกำเนิด

ฟังเด้ออ้มพรมมะจันทร์พันง่า สองเฮาฮักกันมาตั้งแต่ชาติก่อนพุ้นบุญอ้ายบ่เถิง เปิงชาติชั้นเฮามาเกิดเป็นนก คันเนาคอนขันฮ่วมมะกันคีค้อย สาวคำนางเป็นนกเขาตัวน้อยง้อยคอนฮ้องหาขู่ กู้หุกกูแล้วกระเย้ยขันท้าอยู่ดอน งอยคอนแล้วโตนลงคาบเยื่อ เพื่อหาแมงหมดไม้ทางคุ้ยเขี่ยดิน ตีนเขี้ยแล้วปากกระเหล่าเคยจิก ฉลิกคีงหรือขนอย่างไปสาลีล้อม สองเฮาพ้อมผัวเมียทั้งคู่พากันไปอยู่ส้นคางเจ้าพ่อพระองค์ หนวดท่านโค้งลงย่อนเป็นฮัง พระฤาษีเลยชังไหล่หนีคาวกี้เพราะเฮามีความเว้าเถียวกันยี่ย่อง ปวดฉมองถ่านเจ้ากระจำให้ด่วนไป บินลัดไม้ต้นต่ำลำหน๋าพากันแปงฮวงฮังอยู่เทิงปายไม้ หลายวันได้มีบุตรตราลูกอ่อน พี่บินจรจากน้องไปหาเพื่อเยื่อแมง มื้อหนึ่งนั้นพอตาวันส่องแจ้งพี่บินหล่วงไปไกล พอไปถึงสาบัวเพื่อกินแมงไม้ บัวเลยได้ทางใบหุ่มห่อ พี่เลยออกบ่ได้เฮให่พ่องหิว คิดจิ้ว ๆ คะนิงแห่งเมียแพง มื้อหนึ่งนั้นพอแต่แสงตะวันใสฮุ่งมะยามเช้า ทางบัวเจ้ากระเลยบานเผยกาบ พี่จึ่งบินออกได้มาหาน้อง อยู่ฮังนางชังอ้าย บ่มีจาจักหน่อย เลยบ่จาอ้ายเมียแก้วส่างเป็น กับชาตนั้นได้มาเกิดเป็นคนได้เอาตนชงครรฮ่วมมารดาแก้ว มีนามแล้วบักไหมลำเป็นซื่อ จนเขาลือส่าย่องไปลำได้ซื่อเสียง

หมอลำกลอน (ฝ่ายชาย): นายสมัย พันธ์โบ อำเภอเขมราฐ จังหวัดอุบลราชธานี

หมอลำกลอน (ฝ่ายหญิง): นางเดือนฉาย หล้าบุดดา อำเภอโพธิ์ไทร จังหวัดอุบลราชธานี