ฟังลำกลอนบุญคุณข้าว โดย หมอลำจำรัส บุบผา และหมอลำสมภาร วรรณพัฒน์

กลอนบุญคุณข้าว

แม่นว่าน้อนาย คันเอาคุณเข่าฟังเบิ่งคุณตา เข่าอยู่นำไฮนามีคุณอยู่มาก ฟังดี ๆ อย่าปากพวกนั่งเป็นสาย คุณเข่านี่มีหลายจนนับบ่คู่ ได้เลี้ยงมนุษย์อยู่ในโลกโลกา เบิดพิยาตกาสาหลายอันเลี้ยงไว้ ตลอดเปิดหมูไก่หมาแม้วแมวโพง ได้กินเข่านี้ลงมีแฮงมีเฮื้อ บ่ช่างเปิดช่างเบื่อกินได้ใส่ยา บ่ว่าดำหรือขาวเป็นเบิดทุกอย่าง ได้กินเข่ามีถ่างจนอ้วนนวนหม เป็นตาจูบตาชม เนื่อหนังใส่ส่อง ไผ่มีเข่าเต็มกองเต็มยุ่งเต็มฉ่าย ขายเอาฮอดสตางค์โลดบ่มียามอั่ง คุณเข่านี่เหลือฝั่ง ถ้วมเก้าถ้วมหัว ได้เลี้ยงพระเลี้ยงจัวศาสนาพระเจ้า อีกจั่งหนึ่งกะมีตั้งแต่เข่ามาค่ำมาหนุน จังว่าเข่ามีคุณเหลือหลายล้นแผ่น ไผแหน่แล้วว่าแหม่นคือข่อยเว่าไป ละมีฮอดใบคุณมันนั่นน่า  คิดเบิ่งแต่ใบก้าที่เฮาปาดออกมา กะให้ควายกินสา คุณมันแหม่นบ่ ได้สิมีแนวถ่อคุณเข่าตาหมุนใหญ่ขึ้นมาแล้วกะสุนเป็นผนเม็ดแก่ กะเฮ็ดเข่าเม่าแหน่กินแสบกินหวาน เหลือนั่นเกี่ยวใส่ลานฟาดดียีหย่อง เฟืองมันงามก็จ่งไว้ถ่ามุงเถียง กะยังว่าจามเฟืองมุงลานมุงเล่า อีจั่งหนึ่งฟืองมันงามกะจ่งไว้ถ่างั่วเกียนจักเอาตอกไปเคียนมัดเป็นค้น ๆ เอาขึ้นไว้เทิ่งต้นไม้บ่อนดี ๆ ให้งัวกินเบิดปีพีเลยบ่จ่อย ได้สิแหม่นของค่อยคุณเข่าเฮาทำ ยามสิกินเฮาตำฮำมันให้ไก่ ขี่แกบเอาไปใส่ฝุ่นฮั่วฝุ่นสวน เอาใส่นากะพวนงามดีกว่าเก่า เข่าปายนั่นใส่เหล้าดีคักปานหยัง กินแล้วฮากถ่อมดังมึนเมาเอาใหญ่ ขี่มันหว่านให้ไก่แก้โรคโรคา หรือเอาไปอ่อยปาเข้าลานเข่าตุ้ม มันกโยดเป็นปุ้มมาใส่ในลาน อีกจั่งหนึ่งกะว่าตุ้มโตหมานสมควรบ่ค่อย สี่แท้เอาเหล้าอ่อยมันจั่งมาหา มันสิมีพาสาหยังลานเป่า ๆ คันบ่มีขี่เหล้าบอกว่ามึงเย็นจังหว่าเข่านี้เป็นคุณเบิดทุกอย่าง ไผก็คิดก็ส่างรีบคิดสันหา เรื่องคุณเข่าน้ออาคือความผมเว่า เฮ็ดอี่หยังก็เข่าทุกอย่างหลายอัน เช่นทำทำอาหารเอาบุญเอาน้อยมีแต่เข่าอ้อยต้อยที่เป็นเครื่องอาหารสีนาวาสมพรข้าสาธุกาล คือปากหว่าขอให้ขึ้นชั้นฟ้า สวรรค์พุ้นแหม่นบ่อนเนา สาเดอเจ้าขู่สู่คนว่าเด้อ

หมอลำกลอน (ฝ่ายชาย) : นายจำรัส บุบผา อำเภอเมือง จังหวัดอำนาจเจริญ

หมอลำกลอน (ฝ่ายหญิง) : นางสมภาร วรรณพัฒน์ อำเภอเมือง จังหวัดอำนาจเจริญ