ฟังลำกลอนการเกษตรพอเพียง (หญิง) โดย หมอลำจำรัส บุบผา และหมอลำสมภาร วรรณพัฒน์
กลอนลำการเกษตรพอเพียง
ฟังเอาไว้พี่น้องทั้งหลาย หญิงและชายฟังเอาจำไว้ ไทยเฮาโชคยิ่งใหญ่ล้นเกล้าของเฮาพระองค์เอาของดีวิเศษ การเกษตรพอเพียง คุณอาให้ชาวไฮชาวนาชาวสวนชาวฮั้ว ให้ไปทั่วทุกภาคของไทย แม่นอยู่ใกล้อยู่ไกลภาคเหนือฮอดใต้ ท่านได้เอาใจใส่ภาคกลาง อีสาน เป็นห่วงลูกห่วงหลานคนไทยทุกเหล่า บ่ได้เลือกพงศ์เผ่าชาวไฮ่ชาวนา ให้เลี้ยงปูเลี้ยงปลาหมูหมาเป็ดไก่สมมติว่ามีนาอยู่เก้าไร่ สิบไร่คือทำนาแบบใหม่แบ่งออกเป็นตอน หนึ่งเฮ็ดเฮือนนอนหนึ่งงานกะได้ บ่อต้องเฮ็ดหลังใหญ่ทรงไทยปันหยา ห้าไร่หนึ่งเฮ็ดนาหว่านก้าปลูกข้าว เฮ็ดข้าวเหนียวข้าวเจ้าแล้วแต่พอใจ อีกงานหนึ่งบ่ต้องไถขุดสระแม่ป้า ท่านนั้นว่าเลี้ยวปลาดีหลาย ปลาสวายปลาดุกปลาเข็งปลาค่อสิเลี้ยงปลาหยังหน่อแล้วแต่พอใจ อีกหนึ่งไฮ่นั้นไถสวนครัวบ่ขาด ปลูกผักกาดหัวหอมผักชี ปลูกฮอดกระหล่ำปลี กะเทียมขิงข่า อีกแปลงหนึ่งท่านว่าเลี้ยงไก่เป็ดหมู เลี้ยงแล้วให้ดูแลอาศัยมูลปุ๋ยคอก องค์สมเด็จท่านบอกทุกอย่างดีหลาย ผักสวนครัวกะได้ขายเหลือกินเหลือใช้ มูลเป็ดไก่มูลหมูมูลงัว มูลควายบ่จำเป็นต้องรวยพอกินพอใช้ พากันเอาใจใส่การเกษตรดีหลาย เหลือกินแล้วกะขายเงินทองพอใช้ แม่นบ่แล้วแม่ใหญ่พระองค์ทรงสอน ให้เฮามีเฮือนนอนครบปัจจัยสี่ ไผมีที่ปลูกผักเลี้ยงปลา ส่วนหนึ่งแบ่งเฮ็ดนาข้าวเหนียวข้าวเจ้า เอาใส่เล้าไว้กินครอบครัว ใส่ปากสิบ่ทุกข์บ่ยาก มีหน้ามีตานี้ละชุมชาวนาเกินดีวิเศษ กระดูกสันหลังประเทศแม่นบ่ชาวนา สมเด็จพระราชาเพิ่นได้โปรดเกล้า เป็นห่วงพวกหมู่เจ้าพสกนิกร อย่ามัวหลับมัวนอนตื่นเดี้กลุกเช้า ลุกนึ่งข้าวเป่าไฟ เพิ่นให้เฮาว่องไวละกองกิเลส ให้รักษาประเทศสร้างสามัคคี ทำแต่สิ่งที่ดีพระองค์ตรัสบอก อย่าเป็นคนปอกลอกให้ซื่อใจตรงเคารพธงไตรรงค์ยามฮ้องเพลงชาติ เฮาอย่าได้ประมาทสามอย่างดวงใจสมกับคำว่าไทยเป็นเอกราช เฮาบ่ได้ขายชาติให้แก่ผู้ใด๋ ประชาธิปไตยการปกครองดีเลิศ จำไว้เถิดคนไทยทั้งหลาย บ่ว่าหญิงหรือชายชาวนา พ่อค้า องค์ในหลวงท่านว่าการเกษตรพอเพียง ไทยเฮามีชื่อเสียงชาวนาเลี้ยงโลก ชาวนาไทยมีโชคในหลวงเมตตา พวกชาวไฮชาวนาเจริญแม่นบ่ แม่นบ่แล้วคุณพ่อการเกษตรพอเพียง
หมอลำกลอน (ฝ่ายชาย) : นายจำรัส บุบผา อำเภอเมือง จังหวัดอำนาจเจริญ
หมอลำกลอน (ฝ่ายหญิง) : นางสมภาร วรรณพัฒน์ อำเภอเมือง จังหวัดอำนาจเจริญ