ฟังลำกลอนโลกใหม่ผู้เฒ่าได้เงินเดือน (หญิง) โดย หมอลำจำรัส บุบผา และหมอลำสมภาร วรรณพัฒน์

กลอนโลกใหม่ผู้เฒ่าได้เงินเดือน

เดี๋ยวนี้โลกเจริญเดินไป บ่อยู่โหย่นพอปานกวยอู่ หมุนเปลี่ยนเวียนของสมัยพัฒนาชายหญิงพ่อแม่ จำพวกชุมคนแก่หกสิบปีขึ้นไป บ่ว่าอยู่บ่อนใด๋ในเมืองบ้านนอก บ่ได้เลือกชั้นดอกชาวไฮ่ชาวนา ผู้เฒ่ามีราคาได้เงินเดือนชั้นดอก รัฐบาลได้ออกกฎหมายบำรุง พวกแม่ป้าพ่อลุงผู้สูงผู้ต่ำ ได้ไปเบิ๊ดผู้ก่ำผู้ดำผู้ขาว บ่ได้แต่ผู้บ่าวผู้สาวอายุบ่ฮอด หกสิบปีได้ตลอดว่าแต่เป็นคนไทย บ่ว่าใกล้ว่าไกลเหนือใต้ตกออก รัฐบาลได้บอกตามบัตรประชาชน นี้ละคนเกิดคนมีคุณมีค่า อยู่บ้านดงบ้านป่ากะเท่าเทียมกัน ถือว่าความสำคัญประชาชนเป็นใหญ่ รัฐต้องเอาใจใส่ดูแลคนไทย การปกครองประชาธิปไตยมีเสรีภาพ แม่นผู้ใด๋กะทราบสิทธืเสรี เพราะเฮามีของดีล้ำเลิศ เฮามีของประเสริฐสามอย่างคนไทย แม่นสิอยู่ใกล้ไกลบ่ให้ประมาท ของสามอย่างหนึ่งชาติหมายถึงโตเฮา (เว้า) สองคนไทยต้องเอาศาสนาเคารพไว้นบกราบไหว้อี่หลี ศาสนาได๋กะดีคือกันทุกอย่าง สอนกะบ่ได้ต่างให้คำแต่ดี สามราชวงศ์จักรีของไทยคู่ชาติ องค์พระบาทสมเด็จพระเจ้าอยู่หัวให้หมู่เฮาเกรงกลัวเคารพนบไหว้ กะมีเครื่องหมายไว้คือธงไตรรงค์สีขาวนั้นละพระสงฆ์ศาสนาของชาติ สีน้ำเงินมีอำนาจปกปักรักษา เรียกว่าพระมหากษัตริย์ของเฮาจำไว้ บาดนี้ไล่ไปฮอดสีแดง สีนี้ละเข้มแข็งเลือดไทยทุกหมู่ จั่งว่าให้อยู่ร่วมสามัคคีนี้ละธงชาติมีสามสีธารทองบอกไว้ แม่นบ่แล้วพอ่ใหญ่แม่ป้าน้าอา ชาติเฮาพัฒนามีเสรีภาพ แม่นผู้ใด๋กะทราบเอาละพอใจ ผู้เฒ่าเป็นคนไทยมีเงินยังชีพ ได้มาแล้วกะรีบทำบุญทำทาน (เว้า) แจกให้ลูกให้หลานไปโรงเรียนยามเช้า เงินผู้เฒ่าคนละสิบละซาว แม่นบ่แล้วน้าสาวคือภารทองว่า

หมอลำกลอน (ฝ่ายชาย) : นายจำรัส บุบผา อำเภอเมือง จังหวัดอำนาจเจริญ

หมอลำกลอน (ฝ่ายหญิง) : นางสมภาร วรรณพัฒน์ อำเภอเมือง จังหวัดอำนาจเจริญ