ฟังลำล่อง ประเพณีบุญข้าวประดับดิน บุญข้าวสาก โดย โดย หมอลำสินสมุทร รัตนมูล และหมอลำลำใย พรมสำลี
กลอนลำล่อง ประเพณีบุญข้าวประดับดิน
อันนี่ละคุณแม่เอ้ยเผิ่นว่าเดือนสิบเอ็ดสิบสองค่อยลมวอย วอยเข้าเดือนยี่ฮอดเดือนสามเดือนสี่แดดกระสีฮ้อน ๆ ลมฮิ้วพัดบ่แฮง ตกมาฮอดหน้าแล้งแห่งไง่เป็นผง ฝนบ่ลงฮวยฮำแผ่นดินกะเลยแห้ง ดอกสะแบงขู๋ร่วงหันหัวลงปิ้นปั่นหัวลมหันพัดจั้น ๆ หมุนปิ้นว่าล่นลงหย่างลงท่งกว้าง ๆ หอมกิ่นกะยอมบานเห็นต้นตาลสอนลอนป่ามอยู่โพนเฮื้อโพนหมากเขืออยู่ฮิมห่วยฝูงงัวควายหย่างเลาะล่งทงกินเฟืองแห้ง ๆ ยามแล้งผัดแห่งหิวลมพัดสีฮิ้ว ๆ แวะห่มเซ้าเย็น เห็นแต่เมฆไหลผ่านไปเป็นปุ้มไปเป็นชุมเป็นก้อนตามลมไปหย่าว ๆ ฤดูหนาวเปลี่ยนแล้วเดือนห้ากะถ่ายมาเสียงฟ้าฮ้องตึ้งตั้งเดือนห้าต่อเดือนหกฝนตกมาฮวยฮำดอกกะเจียวเลียนต้น สายฝนลินฮำย้อยฝนมาฟ้าเหลี่ยนเดือนหกเพ็งบุญบ้องไฟแล้ว ๆ เตียมพ้อมสิเห็ดนา เดือนฟ้าฮ้องตึ้งสิคาดหว่านไถดำ ทำเทิงนาเทิงสวนคาดไถดำกล้าฝูงชาวนาเตรียมตัวพร้อมสิทำนากล้าหว่าน ผ่านไปเดือนแปดแล้วเจ้าหัวเข้าอยู่กำจำพรรษาสามเดือนล้ำจั่งได้เที่ยวแสวงบุญเดือนเก้าดับนั้นแม่นข้าวประดับดินสู่ปีจำไว้ประเพณีเฮาได้ทำตามฮีดเก่าผีพ่อแม่และลูกเต้ามาเอาข้าวห่อไปกิน ยมพบาลเปิดป่องท้างประตูแห่งนรกให้หมู่ฝูงเปรตเผดผีออกมาได้ให้มาเอายังข้าวของทานทุกสิ่งอย่าง ต่างกะเตรียมกะต่าพร้อมมาลอถ้ารับของเต็มทีหลายแต่พี่น้องผู้บ่เฮ็ดบุญหาผีผัวมากะบ่เห็นเมียฮักส่งทานไปให้พ่อแม่ไกลไปแล้วตายเป็นผีหนีเป็นเผิ่นลูกเต้าบ่ถูกเอิ้นมาข้าวข้าวของเฮาแม่นไปไสเด้นอบ่ส่งทานไปให้ได้ขอกินนำเพื่อนคืนเมือกะต่าเป่านั่งกอดเข่าถ้าลูกเต้าบ่เห็นข้าวส่งมาพวกพ่อลุงแม่ป้า อย่าป๋าปล่อยคองหลังผู้เฮายังให้ทำบุญส่งทานถวายพร้อมอย่าสุไลลาถิ่มประเพณีฮีตเก่าเดือนสิบเพ็งข้าวสากนั้น เตรียมพร้อมสู่อันทั้งผัวเมียและลูกนั้นพ่อและแม่ผู้สูญหายให้เฮาทำบุญหาอย่าสิลาไลจ้อยเผิ่นมาคอยมาถ้าคันแม่นเถิงเวลายมพบาลเผิ่นปดป่อยเผิ่นมาคอยห่อข้าวให้เฮานั้นส่งทาน เดือนสิบเพ็งผ่านแล้วฝนตกต่าวเค็งๆ เดือนสิบเอ็ดเพ็งกะเวียนมาจบคบสามเดือนแล้ว เจ้าหัวไลครองผ้าสิสึกข๋าลาเพศเหตุมีงานอยู่หน้าสิลาผ้าห่มไตรออกพรรษาแล้วได้สิลาวัดลาวาผู้เผิ่นหลายพรรษากะค่อยเฮียนเพียรสร้างทางกฐินกะเตรียมพร้อมถวายองค์หลวงผ่อผู้เพิ่นใจก่อสร้างประสงค์ต่อบุญพอเป็นทุนถวายหน้าเวลาตายกะหายห่วงสวงสวรรค์ชั้นฟ้าสิคอยถ้าสู่วิมานวิญญาณขึ้นสู่สวรรค์ฝันเลิง ๆ ๆ
หมอลำกลอน (ฝ่ายชาย): นายสินสมุทร รัตนมูล อำเภอโพธิ์ไทร จังหวัดอุบลราชธานี
หมอลำกลอน (ฝ่ายหญิง): นางลำไย พรมสำลี อำเภอโพธิ์ไทร จังหวัดอุบลราชธานี