เสียงและบทสวดเชิญขวัญ โดย นายอุดม ทางาม

“ศรี ศรี สิทธิพระพร บวรแวนวิเศษ อเนกเตโซ ชัยมังคละมาสิริมังคเลส ศาสตเภทอาขุนบุฮมปุนแปงแล้ว ให้ลูกแก้วออกกินเมือง ฤทธีเฮืองทะรงแท่น มื้อนี้แม่มหาคุณ ขุนแถนดาแต่งแล้ว ให้ลูกแก้ว กิ่งเป็นราชาสืบสร้างเมืองมิ่งกว้างนาครอง วันปองเป็นโชค ไตรโลกย่อมลือชาทะรงอานุภาพยิ่ง เป็นเจ้าจอมมิ่งเมืองแมน ทะรงแท่นถนัดล้ำ มื้อนี้ค้ำคูณคงพญาจักทะรงทศราช พรหมนาถเล่าแถมพร พระอิศวรหลอนแถมโชค พระนารายณ์โยคสิทธิชัย ท่าวสหัสนัยประสาทฝนห่าแก้ว ใจผ่องแผ้วบริสุทธิ์ อุตตมโชค อุตตมโยค อุตตมดิถี อุตตมนิธี อุตตมศรีพิลาส อินทะพาสพร้อมไตรยางค์ ทังนาวางคาดคู่ พร้อมกนอยู่ สอนลอนอาทิตย์จรจันทะลึก อังคารถึกมหาชัย พุธพัสไปเป็นโชค ศุกร์เสาร์โยคเดชมงคล อันเป็นผลหลายประโยค อุตตมโชคแท้ดีหลี มเหสักขีหลิงล่ำโลก ให้หายทุกข์โศกนานา อภัยราชาขึ้นทะรงแท่น หายโพยแม่น วันดี กัณหาชาลีเมือฮอดปู่ สถิตอยู่เย็นใจ ท้าวศรีสัญชัยภูวนาถ นิมนต์ราชบุตตา ให้เป็นราชาดังเก่า เป็นเจ้าเลาสองที วันนี้เป็นวันดิถีทั้งห้า เจ้าฟ้าเล่าแถมคุณ พรหมมะปุนปองราช พระแก้วอาจสิบประการ วรสารตัวองอาจ ขึ้นสู่อาสน์เร็งโญ วันนี้โพธิญาณหน่อฟ้า เตชะ กล้าเสวยเมือง พระบุญเฮืองคุ้มครองไพร่ ทศราชไต่ตามธรรม จำนำสัตว์ให้พ้น วันนี้ดีลื่นล้นประมาณ หุระมานใจ ผ่องแผ้ว นิรมิตผาสารทแก้วก่อแปงเมือง นาครองเฮืองทศราช เซี่ยงเครืออาจขุนเม็ง เงินยวงเซงเนาว์เนืองคับคั่ง สะพรั่งพร้อมฝูงหมู่เสนา เทวดามาเป็นบริวารแวดล้อม มาอยู่อ้อมทุกหมู่โยธา ทังนาคานาคีครุฑนาค ทุกภาค พร้อมธรณี เมฆลาศรีสาวท่าว เชื้อท่อนท้าวบรเมศวร บรมวรฤทธีกล้า เอาแผ่นฟ้าขี่ตางญาณ กุมภกัณดาลยมราช จตุโลกอาจองค์หลวง ทั้งควงบนบุรม เจ้าฟ้า เดชะกล้ากว่าสิ่งทั้งหลาย จึงยายยังพระพรแลควงจุ้มลงมาคุ้มฝูงคนให้หายกังวลแลเดือดฮ้อน โพยพยาธิข้อนพ่ายไป ทั้งภายในและภายนอก แดนด้าวคอกคีรีพระฤาษีสิทธิเดช จบเทพพร้อมอาคม นิยมประสิทธิ์ประสาท พรแก้วอาจดวงดี มื้อนี้แม่นมื้อสรร วันนี้แม่นวันชอบ ประกอบด้วยฤกษ์ งามยามดีเป็นศรีสิทธิชัยมงคลดิเรก อเนกสวัสดีแท้ดีหลี

บัดนี้ฝูงข้าน้อย ใจชื่นช้อยยินสะออน ขอโอมอ่านด้วยพรแก่… ผู้ทะรงคุณคามมาก ข้าน้อยหากขอวอน คุณอนุสรณ์สามสิ่ง คือรัตนตรัยแก้วกิ่งดวงดี กับทังคุณประเสริฐศรีทุกแห่ง ทุกแหล่งหล้าสงสวรรค์ มาเสกสรรเป็นพระพร คือ อายุ วรรณะ สุขะ พละ อาโรคยะ ปฏิภาณอธิปติคุณสารสมบัติทุกเยื่อง ขอเดชะอานุภาพกระเดื่องธรณี ดังแสงสุรีย์ส่องสว่างโลก หายทุกข์โศกสวัสดี ชยตุ ภวังค์ ชัยมังคลัง จงเป็นชัยมงคลอันแวนยิ่งถ้วน ทุกสิ่งบริบูรณ์นั้นเทอญ”

หมายเหตุ : บทสู่ขวัญอาจไม่ตรงกับเสียงที่หมอพราหมณ์สวด อาจเปลี่ยนไปตามลีลาของหมอพราหมณ์แต่ละคน