ฟังลำกลอนล่องประวัติเมืองอุบล โดย หมอลำบัวศรี เหมแดง และหมอลำสวาสดิ์ ประทุมทอง

กลอน ประวัติเมืองอุบล

เกิ่น..แม่น้ำชีมันไหลบุ้นแม่น้ำมูลมันไหลส่งไหลไปตกแม่น้ำโขง ไหลลงโฮมอ่าวกว้างขวงกั้นแม่นทางเล…น่อ…ฟังเด้อพวกพี่น้องท้องถิ่นดินอุบล ฟังเหตุผลของฉันผู้ประพันธ์กลอน เตรียมปากกาลงจ้อประพันธ์กลอนช้อนต่อ แต่กกเค้าเหง่ากอเมืองอุบลเขตบ้านพระคุณท่านให้อ่านตรอง ทางสวาทเด้อพี่น้องผู้ลำล่องเป็นนิทาน อดีตการยังมีแต่เดิมคราวกี้ เมืองอุบลเฮานี้ท้าวคำผงผู้มาสร้างหัวทีก่อนหมู่ ย้ายมาจากบ้านดู่มาถางดงอู่เผิ่งเหิงแล้วตั้งแต่นานมา ตั้งเมืองตั้งบ้านเอานามเก่าเมืองหนองบังได้ขนครัวหนีมาพ่อพระตาพาย้าย กายลงไปนายั้งจำปาศักดิ์พอช้นอยู่ ตั้งบ้านดู่บ้านแกพอได้แวได้ช้นโนนบ้านบ่ห่างกัน อุปฮาดเมืองเวียงจันทร์ครั้งนั้นผัดยกทัพมาตี องค์พระวอกะเลยดับชีวีอยู่สนามแต่คราวนั้น เลยมาหั่นองค์พระตาเลยอาพาธ กะเลยมรณาดเมี้ยนเมือฟ้าสู่สวรรค์ เหลือคำผงกับท้าวพรมอ้ายน้อง ทั้งผ่องน้ำตาไหล ก่อนพระตาลาวตายได้สั่งความเอาไว้ ขั่นพ่อตายให้กลับคืนเมือก้ำตามลำมูลให้จำไว้ลูกพ่อ ให้เอาศพพระวอกับพระตานี้แหล่ว เอาเผาพร้อมพร่ำกัน ว่าท่อนั้นพ่อกะเล่าเลยตาย เอาใส่คอพายสารต่างเมือทางเหนือล้ำเลามาตามทามชังแถวริมโขงค้ายบ้านดู่ เลยมาเผาอยู่หั่นพอเสร็จแล้วจั่งได้หนี ดูกอัฐิคู่มือนี้กะยังอยู่บ้านสักเมือง แขวงปากเชเมืองลาวตั้งแต่ปรางคราวพุ้น เป็นเจดีย์ก่อหุ่มเชิญเด้อให้ไปเบิ่งเรือนบ่เถิงอย่าสิเว้าคนเฒ่าเผิ่นสิหัว นี้ละเป็นต้นขั้วประวัติศาสตร์เมืองอุบลเหลือแต่คนสำคัญตั้งแต่ปรางคราวนั้น มีท้าวคำผงท้าวพรมท้าวเพี้ยท้าวจันทร์หมาคำท้าวก่ำ มาตามลำแม่น้ำหลดเชาเลื้อยเมื่อยแฮง มาฮอดแก้งแขวงส้มปล่อยดอนมดแดง พากันบุกเฮือนชานได้หนี่งปีกะเลยย้าย อันตรายเหลือล้นฝนตกแฮงน้ำออกแก่งผั่นมาเกิดน้ำท่วมกะเลยย้ายผ่ายหนี ถอยขึ้นมาฝ่ายพี้ตามฝั่งวังมูล แสนอุดมสมบูรณ์ท่ามูลวังกว้าง เป็นดงหลวงอู่เผิ่งมาเลิงใกล้ห้วยม่วง เลยพาป่วงพี่น้องมาตั้งถิ่นฐานได้ตั้งเมืองตั้งบ้านเอิ้นว่าท่าวังหิน ขุดขี้ดินเป็นคูอยู่เลาะมูลตันไว้ น้ำมูลไหลเวินต้องเดือนสิบสองหัวลมต้องอยู่วี้วี่ ถนนเขื่อนธานี

หมอลำกลอน (ฝ่ายชาย): นายบัวศรี เหมแดง อำเภอเขมราฐ จังหวัดอุบลราชธานี

หมอลำกลอน (ฝ่ายหญิง): นางสวาสดิ์ ประทุมทอง อำเภอเขมราฐ จังหวัดอุบลราชธานี